Tropang Giga 4-0 na
CEBU, Philippines — Bisan dunay gibatyag nga sakit sa iyang kiting, padayon nga nagmangtas ang Sugboanong guard nga si RR Pogoy human kini mipabuto og 30 puntos aron pangulohan ang TNT Tropang Giga ngadto sa 110-91 nga kadaogan batok sa Phoenix Super LPG sa PBA bubble play didto sa Smart 5G-powered AUF Sports Arena sa Angeles City, Pampanga niadtong Lunes sa gabii.
Ang Tropang Giga nabiyaan og 14 puntos sa sayong bahin sa aksiyon, apan ubos sa liderato ni Pogoy, ang Tropang Giga hina-hinay nga nakabangon dayon na ngadto sa pagpaulbo sa Fuel Masters sa sangka tali sa wa'y pildeng mga koponan.
"For us coaches, he's supposed to take a rest. But the kid wanted to play. We're lucky to have a player like him, all heart," matud pa ni TNT coach Bong Ravena agi'g pagdayeg ni Pogoy.
Dako sab og natampo sila si Poy Erram, Simon Enciso, Bobby Ray Parks, Troy Rosario, Ryan Reyes ug Jayson Castro nga nagkumboya'g 74 puntos alang sa Tropang Giga nga mipahugot sa ilang pagkupot sa solong liderato bitbit ang perpektong 4-0 record.
Sa laing bahin, si Mo Tutuaa mibugha og 35 puntos, samtang sila si Arwind Santos, Marcio Lassiter ug Von Pessumal nagkumbinar og 55 puntos sa dihang gipakaging sa defending champion San Miguel Beermen ang TerraFirma Dyip, 105-98 alang sa una nilang daog sud sa tulo ka duwa didto sa bubble. Ang Beerman nagtangag na karon og 2-2 nga baraha.
- Latest
