Reperi gipalayas sa PBA bubble
CEBU, Philippines — Si PBA commissioner Willie Marcial mipahamtang sa labing taas nga silot sud sa PBA bubble sa dihang iyang gipapauli ang reperi nga si Sherwin Pineda human sa kontrobersiyal niining tawag atol sa himalatyong segundos sa duwa tali sa Rain or Shine Elaster Painters ug Northport Batang Pier niadtong weekend.
Ang maong opisyal maoy mipito og foul batok ni Paolo Taha sa Batang Pier sa nahabiling 1.3 segundos sa duwa nga miresulta ngadto sa duha ka free throws ni Rey Nambatac nga maoy nakapadaog sa E-Painters, 70-68.
“Papauuwin ko na. Maling tawag. Di ko matatanggap ‘yung tawag na ‘yun,” matud pa ni Marcial human gi-review ang kontrobersiyal nga play uban ni technical committee ug deputy commissioner Eric Castro.
Si Pineda dili na makareperi pa sa nahabiling bahin sa duha ka bulan nga torneyo, samtang ang liga nagplansa pa sa mga detalye sa iyang pagbakwit sa PBA bubble didto sa Clark, Pampanga.
Si Marcial midugang nga duna sab siya'y gipangsuspenso ug gipamulta nga duha ka reperi human sa unang semana sa pagsugod og balik sa 2020 Philippine Cup nga misikad niadtong Oktubre 11.
- Latest