Crawford-Brook showdown sa Nobiyembre 15

CEBU, Philippines — Si WBO welterweight champion Terence “Bud” Crawford gikatakda nga modepensa sa iyang titulo batok ni kanhi welterweight world champion Kell Brook sa special edition sa Top Rank on ESPN karong Nobiyembre 15 (oras dinhi sa Pilipinas) sa wala pa hisayring binyu.

Matud pa ni Top Rank promoter Bob Arum, nga si Brook usa sa labing tadhan nga mga boksidor karon sa kalibotan ug seguradong makahatag kini og usa ka dakong hagit ni Crawford nga naglaraw bawion ang iyang trono isip pound-for-pound king.

Si Crawford wala pa'y pilde sa 36 ka away diin 27 sa iyang mga biktima iyang gipatikangkang. Naghari siyang WBO welterweight champion sukad pa niadtong Hunyo 9, 2018 sa dihang iyang gikulata si Jeff “The Hornet” Horn sud sa siyam nga hugna.

Napanalipdan ni Crawford ang iyang bakus tulo ka higayon, apan wala na makaaway pa sukad iyang gipakamang si Egidijus “Mean Machine” Kavaliauskas sa ikasiyam nga hugna niadtong Disyembre sa miaging tuig.

Sa iyang bahin, si Brook nagkupot og 39-2 record uban ang 27KOs. Naghari siya kanhi isip IBF welterweight champion ug nakatilaw sa bugtong niyang pilde isip welterweight sa mga kamot ni Errol Spence Jr. niadtong Mayo 2017.

Sukad sa iyang kapildihan ni Spence, si Brook mikadlit og tulo ka sagunson nga daog sa junior middleweight division.

Ning higayona, manaog siya og balik sa welterweight alang sa gihandum niyang sangka batok ni Crawford.