CEBU, Philippines — Duha ka duwa matag adlaw sa eliminasyon ang ipahigayon sa pagbalik sa aksiyon sa PBA didto sa Clark bubble sugod karong Oktubre 11 didto sa Angeles University Foundation (AUF) gym.
Hinuon sa playoffs, ang mga duwa mahitabo matag Miyerkules, Biyernes ug Domingo na lamang.
Kabahin kini sa plano sa PBA nga humanon ang Season 45 Philippine Cup sa ikatulong semana sa Disyembre aron ang mga players makaselebrar pa sa Pasko sa tagsa-tagsa nila ka mga pamilya.
Ang tanang mga personalidad sud sa bubble estriktong mosunod sa mga patakaran sa kaluwasan ug panglawas, apil na ang pagsul-ot og facemask puwera na lang sa 10 ka players nga moduwa sud sa korte ug sa tulo ka mga reperi. Gidili ang pag-apir, first-bumps ug uban pang lihok nga dunay kontak sa usa'g-usa.
Ang tanang 12 ka teams nakasud na sa PBA bubble ug nagpanikad nang moduwa sa liga nga nahunong sukad pa niadtong Marso gumikan sa pandemiya.
Kadtong nakasud na sa bubble, wala na'y tugotan nga makagawas. Bug-at nga silot ang ipahamtang niadtong mga magpabadlong, apil na ang P100,000 nga multa.