CEBU, Philippines — Hapit na mouyon si MMA star Conor McGregor sa mga termino kabahin sa sangka nilang Manny Pacquiao.
Mao kini ang gipadayag sa head trainer ni McGregor nga si John Kavanagh.
Kon mahitabo ang away sa umaabot, si Hall of Fame trainer Freddie Roach nagkanayon nga si McGregor wa'y bisan gamay na lang nga tsansa batok sa bugtong eight-division world champion sa kasaysayan sa boksing.
Dili lang kay mao na, gilantaw pa ni Roach nga sayon kaayo ni Pacquiao pagpatikangkang ni McGgregor sa higayon nga sila magboksing.
Ang gipasabot ni Roach mao ang makalisang nga pagpakatug ni Pacquiao ni Hatton sud lamang sa duha ka hugna niadtong 2009.
Naukay ang isyu kabahin sa planong away nilang Pacquiao ug McGregor human ang nauwahi mipasiatab sa iyang Twitter niadtong Biyernes nga magbugno sila ni Pinoy'ng senador didto sa Middle East sunod tuig.
Mismo si Pacquiao, pinaagi sa iyang special assistant nga si Jake Joson, ang mikompirmar nga gusto siyang makig-away ni McGregor alang sa iyang mga kababayan kay buot man niyang idonar ang tipik sa iyang premyo ngadto sa mga biktima sa Covid-19.