CEBU, Philippines — Mitusik pa ang Boston Celtics ug gipilde ang Miami Heat sa Game 5 sa iskor nga 121-108 aron makaangkon og laing kinabuhi sa ilang "best-of-seven" NBA Eastern Conference Finals kagahapon didto sa Orlando, Florida.
Si Jayson Tatum mitigbas og 31 puntos uban ang 10 ka rebounds, samtang si Jaylen Brown miligwat og 28 puntos alang sa Celtics nga milaslas sa bentaha sa Heat ngadto na lang sa 3-2.
Ang Heat naglabaw og 12 puntos sa unang kuwarter ug mao gihapon ang abante sa halftime sa iskor nga 58-51, apan ang Celtics kalit lang nanginit dayong pabuto og 41 puntos sa ikatulong kuwarter nga maoy nahimo nilang yawi ngadto sa gihandum nilang kadaogan. Si Tatum mikulit og 17 puntos sa maong kuwarter diin gipilde sab sa Celtics ang Heat sa rebounding, 16-5.
Giablihan sa Celtics ang second half pinaagi sa 20-5 run nga maoy nakapabugnaw sa Heat. Wala na molingi pa ang Boston sukad miabante og nuybe puntos padung ngadto sa final period.
Lain pang upat ka players sa Boston ang mikadlit og double-figures. Si Daniel Theis miamot og 15 puntos ug 13 ka rebounds, si Marcus Smart mitampo og 12 puntos, samtang si Gordon Hayward mipuno og 10 puntos.
Si Goran Dragic maoy nangu sa Heat uban ang 23 puntos, gisundan ni Duncan Robinson nga miposte og 20 puntos. Mosuway sila pagtagak og usab sa Celtics sa Game 6 karong Lunes.