PBA teams way angayan ikabalaka

CEBU, Philippines — Dili angay nga mabalaka ang mga teams kon ang mga patakaran sa panglawas ug kaluwasan nga ipatuman sa PBA sa pagsugod og balik sa naputol niining season estrikto nilang pagasundon.

Mao kini ang gipasalig ni Dr. Raul Canlas, ang medical consultant sa PBA atol sa iyang pakigtagbo sa mga team managers ug safety officers sa 12 ka PBA teams nga gikatakdang mobiyahe na sa Clark sunod semana. Tiwason sa liga ang naputol niining Season 45 Philippine Cup karong Oktubre 9 didto sa Clark bubble, kansang konsepto ilang gisunod sa NBA.

Nagsugod na ang preparasyon alang sa pagbalik sa aksiyon sa PBA pinaagi sa pagpaubos sa swab test sa mga players sa Magnolia, Meralco, Phoenix, TNT, Dyip, Alaska, Blackwater, NorthPort, NLEX, Rain or Shine, Ginebra ug San Miguel Beermen.

Sa dili pa sila tugotan nga makasud sa bubble, ang tanang mga players ug team officials kinahanglan nga magpundo sa ilang balay sa mosunod nga lima ka adlaw human sila gi-swab test hangtod sa gikatakda nilang paglarga sa Clark sunod semana aron mopahigayon sa ilang scrimmage.