CEBU, Philippines — Gisuspenso og usa ka duwa si reigning NBA Most Valuable Player Giannis Antetokounmpo gumikan sa pag-headbutt niini sa sentro sa Washington Wizards nga si Moritz Wagner sa ilang duwa.
Na-ejected ang Milwaukee Bucks star human sa insidente nga nahitabo sa ikaduhang kuwarter sa 126-113 nga kadaogan sa Bucks batok sa Wizards niadtong Miyerkules. Nagbasol hinuon si Giannis sa iyang gibuhat. Nagmahay siya kay nagpadala sa iyang emosyon human gi-foul sa makadaghan nga higayon sa maong kuwarter.
Matud pa ni Giannis nga dili makiangayon ang iyang gibuhat ug kon ugaling puwede pa niyang matuyok og balik ang oras ug balikon ang maong sitwasyon sa duwa, dili kini niya buhaton.
Apan si Giannis nagkanayon nga tawo lamang kitang tanan ug makahimo og mga kasaypanan. Buot hinuon niyang kat-onan og leksiyon ang maong kasinatian.