CEBU, Philippines — Ang Sugboanong boksidor nga si Mercito 'No Mercy' Gesta nga tua na karon magbasi sa Amerika, usa sa lima ka mga Pinoy nga gipasidunggan isip World Boxing Council (WBC) "Heroes of Humanity".
Gikauban ni Gesta mao sila si Senador Manny Pacquiao, Games and Amusements Board (GAB) chairman Baham Mitra ug ang mga reperi nga sila si Bruce McTavish ug Robert Bridges.
Gibayaw sila sa bantawan sa kadungganan sa WBC gumikan sa ilang pagkamabayanihon pinaagi sa wa'y puas nilang pagtabang niadtong mga apektado ug labing nanginahanglan ning panahon sa kalibutanong krisis panglawas.
Si Gesta, lumad gikan sa Barangay Labogon Dakbayan sa Mandaue, wa'y hunong sa pagpanghatag og pagkaon sa mga frontliners ug first responders didto sa San Diego County sa California diin siya nagpuyo na karon. Gisugdan ni Gesta ang iyang kawang-gawa niadto pang Mayo ug ang dalaygon niyang buhat iyang gipadayon hangtod karon.
Ang 32-anyos nga si Gesta gikatakda untang mohagit sa wa'y pildeng kampiyon nga si Hector 'El Finito' Tanajara Jr. alang sa WBC USNBC lightweight title niadtong Hulyo 25 didto sa Fantasy Springs Casino sa Indio, California, apan gisibog kini ngadto sa wala pa hisayring petsa human si Gesta ug ang iyang asawa nakasinati og food poisoning bisperas sa away.