Nets, Magic mitikang sa playoffs
CEBU, Philippines — Nasabwat sa Brooklyn Nets ug Orlando Magic ang katapusang duha ka luna sa NBA Eastern Conference playoffs sa managlahi nga paagi kagahapon didto sa The Arena at ESPN Wide World Of Sports Complex sa Orlando, Florida.
Ubos sa pagpangu nilang Caris LeVert ug Joe Harris nga nagkumboya'g 43 puntos, ang Nets milatigo sa Sacramento Kings sa iskor nga 119-106.
Bitbit ang 33-36 record, naangkon sa Nets ang ikawalo ug katapusang pasaporte sa playoffs gumikan kay ang Washington Wizards nga nahimutang sa ikasiyam nga puwesto dili na man makagukod pa kanila.
Ang Orlando (32-38) napilde human ang Philadelphia 76ers mi-rally sa second half aron makubit ang 108-101 nga kadaogan. Apan bisan pa man niini, miabante gihapon ang Magic sa playoffs human ang Washington miyukbo ngadto sa New Orleans Pelicans, 118-107 nga maoy nakatagak sa Wizards (24-45), ang bugtong team nga wa'y daog sa pagsugod og balik sa liga didto sa Orlando, Florida.
Si Cameroonian star Joel Embiid dunay 23 puntos ug 13 ka rebounds sa 76ers, samtang si Tobias Harris miamot og 23 puntos ug 15 ka rebounds.
Sa laing duwa, ang Memphis Grizzlies nga nagkumpayot sa ikawalong puwesto sa Western Conference, miputol sa upat ka sagunson nilang pilde pinaagi sa paglubong sa Oklahoma City Thunder sa iskor nga 121-92.
Si Memphis guard Dillon Brooks miratsada og 22 puntos, samtang sila si Ja Morant ug Jonas Valanciunas mikadlit og 19 puntos matag usa alang sa Grizzlies. Samtang si San Antonio guard Derrick White miiskor og 24 ug si Jakob Poeltl midugang og 19 puntos ug 10 ka rebounds aron ituboy ang Spurs ngadto sa 119-111 nga kadaogan batok sa Utah Jazz.
Misalida sab sila si Jaylen Brown, Jayson Tatum ug Kemba Walker nga nagkumbinar og 55 puntos sa dihang gilubong sa Boston Celtics ang defending champion Toronto Raptors sa iskor nga 122-100.
- Latest
