Bucks no.1 seed sa East

CEBU, Philippines — Mibugha og 33 puntos matag usa sila si Giannis Antetokounmpo ug Khris Middleton alang sa Milwaukee Bucks nga nakabawi sa bugnaw nga sinugdanan aron pakgangon ang Miami Heat sa iskor nga 130-116.

Gumikan sa maong daog, ang Bucks hingpit nang miangkon sa  No.1 seed sa NBA Eastern Conference.

Bitbit karon sa Bucks ang labing nindot nga 55-14 record ning NBA season.

Nagsunod kaniya ang West top seed nga Los Angeles Lakers.  Bisan og wala sila si Jimmy Butler ug Goran Dragic, init kaayo ang Heat sa sinugdanan nga milabaw og 23 puntos  sa first half.

Apan sa kalit lang namugnaw ang Heat sa ikatulong kuwarter. Nailog kadiyot sa Bucks ang labaw, apan ang Heat pabiling abante og sayes puntos padung ngadto sa  katapusang 10 minutos sa aksiyon.

Ang Bucks alkansi gihapon og usa ka lugas sa nahibiling singko minutos, apan sa kalit lang milusad sila og 20-0 run nga maoy nakapabungog sa Heat, 130-111 sa himalatyong segundos.

Si Duncan Robinson mitali og 21 puntos alang sa Heat nga napilde sa Bucks sa labing unang higayon ning season human midaog sa nag-una nilang duha ka engkuwentro.

Sa lain pang mga aksiyon, ang Sacramento Kings miihaw sa New Orleans Pelicans sa iskor nga 140-125, gipakaging sa Phoenix Suns ang Indiana Pacers, 114-99, ang Portland Trail Blazers midaog batok sa Denver Nuggets, 126-115 ug midaog sab ang Los Angeles Clippers sa Dallas Mavericks sa iskor nga 126-111.