CEBU, Philippines — Dobleng trabaho ang nagpaabot sa unahan nilang CJ Perez ug Moala Tautuaa uban sa ilang mother teams sa PBA ug ingon man sa 3x3 national team.
Mao kini ang ilang preparahan ilabi na kay hapit na magsugod og balik ang training sa baketbol sa nasud.
Ang gipaabot na lang karon mao ang pagpagawas sa opisyal nga kamandoan gikan sa Inter-Agency Task Force (IATF) aron makabalik na og training ang 12 ka PBA teams.
Si Perez ug ang Terra Firma (kanhi Columbian Dyip) nagpanikad nang makapakita og aksiyon ingon man si Tautuaa ug ang iyang katropa sa San Miguel Beermen.
Karong Septiyembre, sila si Perez ug Tautuaa lagmit makasugod na sa ilang training uban nilang Alvin Pasaol ug Joshua Munzon.
Sila si Perez, Tautuaa, Pasaol ug Munzon naapil sa Phl 3x3 team nga naglaraw og luna sa labing unang 3x3 event sa Tokyo Olympics sunod tuig.
Ang Team Phl mosalmot unta sa orihinal nga Olympic Qualifying Tournament niadtong Marso 18-22 didto sa India, apan nabalhin kini ngadto sa Austria sa Mayo 2021.
Sangkaon sa Pilipinas ang Dominican Republic, Slovenia, France ug Qatar sa Group C sa maong torneyo diin ang Top 3 moabante sa Tokyo Games.
Sila si Perez ug Tautuaa nakasud sa Phl squad human sila makadaog og gold medal sa 30th Southeast Asian (SEA) Games sa miaging tuig dinhi sa nasud.