CEBU, Philippines — Buhi pa ang paglaum sa Pilipinas nga makaapil sa basketball event sa 2020 Tokyo Olympics nga nasibog sunod tuig didto sa Japan. Matud pa ni Quinito Henson sa The Philippine STAR, nga ang paglaum sa nasud nga makapakita'g aksiyon sa Tokyo Olympics mag-agad sa resulta sa 3x3 basketball men’s qualifying tournament nga pagasalmotan og 20 ka nasud didto sa Bengaluru, India.
Upat na lang ka luna sa Olympics 3x3 ang nahibilin kay ang laing upat gibira na sa host Japan, China, Russia ug Serbia. Ang top 3 finishers sa India moabante sa Tokyo, samtang ang nahibiling usa ka luna angkunon sa mokampiyon sa laing qualifying tournament didto Budapest, Hungary. Ang Samahang Basketbol ng Pilipinas (SBP) mihingan na nilang Joshua Munzon, Alvin Pasaol, C. J. Perez ug Mo Tautuaa aron modala sa bandila sa Pilipinas sa India qualifying nga hangtod karon wala pa'y petsa nga gikatakda. Magsilbe nilang reserves mao sila si Santi Santillan ug Karl Dehesa.