CEBU, Philippines — Tulo na ka bulan nga naglumlom sa Amerika si WBO bantamweight champion John Riel 'Cuadro Alas' Casimero ug wala pa siya'y plano sa pagka karon nga mopauli sa yuta niyang natawhan.
Gikan sa Miami, ang garbo sa Ormoc City mitapon didto sa Las Vegas diin siya magpabilin hangtod nga maklaro na kon kanus-a mahitabo ang giatngan nilang away ni WBA/IBF champion Naoya 'Monster' Inoue.
Segun sa taho ni Quinto Henson sa The Philippine STAR, igsuong mantalaan sa Banat News, ang pangu sa MP Promotions nga si Sean Gibbons nagkanayon nga sa pagka karon, ang wa'y pildeng Hapon nga kampiyon nagpabilin nga maoy sunod kontra ni Casimero.
Midugang si Gibbons nga iyang nakaestorya ang manedyer ni Inoue nga si Akihiko Honda ug miingon kini nga ang away wala pa gikanselar.
Nanghinaut si Gibbons nga mahitabo ang sangka karong Hulyo kon ugaling mabalik na sa normal ang sitwasyon.
Sila si Casimero ug Inoue gikatakda untang magsinukmagay adtong miaging Domingo, apan giuswag kini sa wala pa hisayring petsa gumikan sa padayong pagpanghasi virus nga hangtod karon wala gihapon mapakgang.