Sektor sa sports nag-ambahan
CEBU, Philippines — Wala mag-inusara ang kagamhanan sa gubat niini batok sa COVID-19 pandemic.
Ang mga Pinoy'ng atleta, opisyales ug mga personalidad sa sports nag-ambahan aron modalit og tabang ngadto sa mga health workers ug frontliners nga maoy nangu sa pakigbatok ning makalisang nga sakit.
Ang Philippine Sports Commission (PSC) ubos sa liderato ni William 'Butch' Ramirez midonar og 120 ka mattress alang sa mga health workers sa Medical Center Manila, Emilio Aguinaldo College Medical Center, Fe Del Mundo Medical Center, Capitol Medical Center ug pipila ka mga barangay.
Si volleyball star Jia Morado, ang Philippine women's softball team ug si Bounty Agro Ventures Inc. chief Ronald Mascarinas mitabang sab sa maong dalaygon nga kawsa.
Gi-auction ni Morado ang iyang mga jersey aron makaisa og pundo aron ipalit og PPEs (personal protective equipment) nga iyang idonar sa mga frontliners, samtang ang Blu Girls mipaud-apod og mga pagkaon sa mga doktor, nurse ug staff sa Philippine General Hospital.
Sa iyang bahin si Mascariñas, kansang kompaniya maoy tag-iya sa Chooks-to-Go, midonar og 100,000 ka kilo sa manok alang sa mga medical workers, military men ug volunteers didto sa Bulacan, Tarlac, Pangasinan, Bataan, Rizal, Taguig, Pasig ug Caloocan.
- Latest
