CEBU, Philippines — Mikulit og 30 puntos si Luka Doncic ug gibuak niini ang career 'triple-double' record sa Dallas Mavericks atol sa 127-123 nilang kadaogan sud sa overtime batok sa New Orleans Pelicans sa NBA kagahapon didto sa American Airlines Arena sa Dallas, Texas.
Si Doncic milangkat sab og 17 ka rebounds ug ug mipasa 10 ka assists alang sa ika-22 nga 'triple double' sa iyang karera aron papason ang record ni Jason Kidd.
Nakab-ot ni Doncic ang maong dungog lima ka adlaw human sa ika-21 nga sumad sa adlaw niyang natawhan.
Dako sab og natampo si Kristaps Porzingis nga mikadlit og 34 puntos ug 12 ka rebounds alang sa Mavs.
Gumikan sa pagmangtas nilang Doncic ug Porzingis, wala kaugpo si Pelicans star rookie Zion Williamson nga mikuhit lamang og 21 puntos.
Si Brandon Ingram maoy nangu sa New Orleans uban ang 27 puntos, apan na-fouled out sa overtime. Si Lonzo Ball dunay 25 puntos sa pilderong Pelicans.
Sa lain pang mga duwa, ang Oklahoma City Thunder mipakurat sa Detroit Pistons sa iskor nga 114-107, ang Utah Jazz midaog batok sa New York Knicks, 112-104, midaog sab ang Minnesota Timberwolves dihang ilang giihaw ang Chicago Bulls sa iskor nga 115-108.
Gilubong sa Portland Trail Blazers ang Washington Wizards, 125-104, ang Boston Celtics mipukan sa Cleveland Cavaliers, 112-106, ang Memphis Grizzlies mikuniskunis sa Brooklyn Nets, 118-79 ug ang Miami Heat misumpo sa Orlando Magic sa iskor nga 116-113.