Tinagsip sa NBA
LeBron di kaduwa batok warriors
CEBU, Philippines – Ang superstar sa Los Angeles Lakers nga si LeBron James dili makaduwa sa ilang sangka batok sa Golden State Warriors karong adlawa kay dunay gihambin nga groin injury.
Wala maghisgot si James nga nakahiagum diay siya og injury sa dihang mipuntos og 40 aron pangulohan ang Lakers ngadto sa 118-109 nga kadaogan batok sa New Orleans Pelicans niadtong Miyerkules.
Gawas ni James, lagmit dili sab makaduwa ang sidekick niyang si Anthony Davis gumikan kay dunay gibatyag sa wala niining siko. Bisan og wala ang duha nila ka haligi, inilog gihapon ang Lakers batok sa Warriors nga nagkupot sa labing bati nga rekord ning season nga 12-46.
Embiid gipamulta og $25t sa NBA
Ang pambatong sentro sa Philadelphia 76ers nga si Joel Embiid gipamulta og $25,000 (P1.25 million) gumikan sa pagpamalikas ug dili makiangayon niining binuhatan.
Nahitabo ang pagpabadlong ni Embiid sa dihang miiskor siya og career-high 49 puntos ug milangkat og 14 ka rebounds sa 129-112 nilang kadaogan didto sa ilang korte batok sa Atlanta Hawks niadtong Martes.
Dakong kantidad ang gipahamtang nga multa batok ni Embiid kay sa makadaghan na man siya nagbuhat sa ingon. Matud pa sa mga kadagkoan sa liga nga ang binuhatan ni Embiid wa'y luna sud sa korte.
- Latest