CEBU, Philippines – Miarangkada dayon ang Kiboy's Computer Solutions pinaagi sa pagkastigo sa ASPA, 91-69 pagsugod sa Mayor Edgardo C. Labella 1st Charter Cup Basketball Tournament niadtong Martes sa gabii diha sa Cebu City Sports Institute gym.
Si Vincent Minguito miiskor og 19 puntos, samtang si Gabriel Cometa midugang og 16 puntos alang sa KCS.
Mikuha sab og atensiyon si Arman Lao nga miposte og double-double uban ang 15 puntos ug 11 ka rebounds alang sa KCS nga wala na molingi pa sukad mirehistro og 42-33 nga labaw sa halftime. Misamot pa og kabangis ang KCS sa nahibiling bahin sa duwa hinungdan sa paglubong nila og 22 puntos sa ASPA.
Sa laing mga duwa, ang ARQ Builders/KSB Glass nakaipsot batok sa Athalia 1 on 1, 96-92, samtang ang Fighter 50 Wine nga gipangulohan ni konsehal Dondon Hontiveros mibirada og maayo sa endgame aron paludhon ang LM Paragsa, 74-62.
Si Hercules Tangkay mipabuto og 32 puntos sa ARQ Builders. Giabagan siya ni Ferdinand Lusdoc nga mihipos og 19 puntos ug Jerick Cañada nga mipupo og 15 puntos.
Sa laing bahin, si Jaybie Mantilla maoy nangu sa Fighter 50 uban ang 13 puntos.
Si Hontiveros mitampo og nuybe puntos alang sa Wine Makers nga miposas sa LMP ngadto lamang sa usa ka lugas nga puntos sa katapusang singko minutos sa aksiyon aron sa pagkadlit niini og 12 puntos nga kadaogan.