Jas Burger 3-0 na's 1ST DBL caging

CEBU, Philippines — Naka-eskapo ang Jas Burger sa hagip-ot nga dalan bitbit ang 80-79 nga kadaogan batok sa Shumava Residence sa 1st Dayon Basketball League (DBL) Invitational Basketball Tournament niadtong Sabado diha sa Sambag 1 Sports Complex, Cebu City.

Si Jen Arcelo maoy bayani sa maong kadaogan dihang iyang napasulod ang mahinungdanong itsa sa himalatyong segundos.

Gawas sa iyang pagluwas, si Arcelo mao sab ang topscorer sa Jas Burger  mipupo'g 16 puntos. Ang Jas Burger aduna na'y 3-0 win-loss record sa bracket B standing, samtang ang Shumava Residence adunay 1-1 nga baraha.

Sa laing aksiyon sa bracket B, ang Chicken Proven mikabkab na sab og daog, ning higayona batok sa Niño General Merchandising, 72-69.

Ang Chicken Proven maoy naggukod sa nag-unang tulo ka kuwarter, apan luyo sa ilang mga paningkamot nakuha nila ang tungason nga kadaogan.

Ang Niño General Merchandising nagpabiling nagbitay sa standing uban sa ALFA sa ilang 0-2 win-loss record.

Sa bugtong duwa sa bracket A, ang Bulldogs nakatangag na gyud og daog batok sa Karahus, 77-68.

Si Aron Suson milawog og 19 puntos sa Bulldogs nga nagmangtas sa third period aron papason ang siyete puntos nga labaw sa Karahus sa halftime, 33-40 ug  mao na ang nakabentaha human sa ikatulong kuwarter, 54-49.

Ang Bulldogs nagtangag na og 1-1 nga baraha, samtang ang Karahus padayong nangiwit sa standing sa ilang 0-2 record ning maong liga nga nahimo sa paningkamot ni Sambag 1 barangay councilor Allan Glen Abella.

Gipaluyohan sa Dayon Enterprises Printing Press, AJ Sportswear, Atesor Cakes Art 'N Design ug Cebu's Tasty, ang mga duwa gipadagan ni Edwin Dejacto Sr. sa CEBRA.

PUNTOS MATAG USA

Unang duwa:

BULLDOGS (77) – Suson 19, Salas 15, Tagimacruz 12, Ybañez 7, Abella 6, Manugas 4, Lei 3, Abellita 3, Amparado 2, Nellas 2, 

Colin 2, Magbata 2.

KARAHUS (68) – Escabarte 16, Dequilla 11, Geraldez 10, Englis 8, Rabusa 8, Maru 6, Puerto 5, Solon 4.

Ikaduhang duwa:

CHICKEN Proven (72) – Maglasang 19, Radaza 11, Navasquez 11, Alcantara 9, Taborada 6, Labrador 5, Zion 4,  

Rubio 3, J. Labrador 2, Babayo 2.

NIÑO Gen. Mdsg. (69) – Solivio 17, Genobiagon 16, Onlaga 14, Sanopao 5, Butaya 4, Villamor 4, Roquinasa 4, Buari 3, Macoy 2.

Ikatulong duwa:

JAS Burger (80) – Arcelo 16, Asis 16, Cuizon 15, Jacaban 10, Canedo 7, Abella 7, Abejaron 5, Alcarez 4.

SHUMAVA Res. (79) – Espina 16, Isok 15, Tundag 11, Intes 8, Judilla 6, Gonzaga 5, Enriquez 4, Berondo 4, Muralla 3, Tampos 3, B. Tundag 2, Duenas 2.