Doncic walay bawot ni Leonard
CEBU, Philippines – Giwani ni Kawhi Leonard si Luka Doncic sa dihang gipayaka sa Los Angeles Clippers ang Dallas Mavericks, 110-107 sa bugtong duwa sa NBA kagahapon didto sa American Airlines Travel Center sa Dallas Texas.
Ang duha ka superstars parehong mitali og 36 puntos, apan si Leonard mao ang dunay labing dako nga bahakhak human midaog ang Clippers.
Si Leonard duna sa'y 11 ka rebounds ug duha ka assists alang sa Clippers, samtang si Doncic diriyot maka-triple double kay milangkat man sab siya og 10 ka rebounds ug mipasa og siyam ka assists sa pilderong Mavs.
Ang Clippers nagbitbit na karon og 31-13 record nga maoy ikaduhang labing nindot sa Western Conference sunod sa Los Angeles Lakers, samtang ang Mavericks natagak ngadto sa 27-16.
Sayong miratsada ang Clippers hinungdan nga misutoy sila ngadto sa 60-49 nga bentaha sa halftime. Nakagukod hinuon ang Mavs ug gani nakatilaw pa og labaw human sa duha ka free throws ni Doncic sa nahibiling 5:43 sa duwa, apan misalida sab dayon si Leonard aron salbaron ang Clippers.
Human sa maanindot niyang assist nga miresulta ngadto sa 3-pointer ni Landry Shamet, si Leonard milansang sa kaugalingon niyang tres aron pagpaginhawa og lawom sa Clippers uban ang otso puntos nga labaw, 108-100 sa hinapos nga bahin sa aksiyon.
Si Shamet mihipos og 18 puntos, samtang sila Lou Williams ug Montrezl Harrell nagkumbinar og 30 puntos alang sa Clippers nga mitala sa ikaupat nilang sunod-sunod nga daog.
- Latest