CEBU, Philippines — Nakita ni Phoenix Fuel Masters coach Louie Alas nga krusyal ang papel ni Cebuano point guard Brian Heruela sa ilang kampanya sa sunod season sa PBA nga buksan sa Marso.
Si Alas nagkanayon nga gikuha nila si Heruela sa trade gikan sa Blackwater Elite tungod kay mao kini ang mopalig-on sa ilang depensa ilabi na nga dili pa makaduwa ang sinaligan nilang All-Star nga si Calvin Abueva nga suspendido gihapon sa PBA.
"Integral part siya ng defensive schemes namin especially 'yung full-court defense namin," matud ni Alas sa Spin.ph.
Si Alas mitug-an nga dugay na niya nga giinitan ang kanhi University of Cebu (UC) Webmaster cager ug dako niyang kalipay nga nakuha na gyud kini sa iyang koponan.
Gidugang ni Alas nga bisan og makapuntos, si Heruela mas nailhan isip defensive player ug tungod sa gidak-on sa ilang lawas, aduna kini abilidad nga mobantay og mga point guards ngadto sa dagkong mga magduduwa.