Mercado bag-ong alas sa Phoenix
CEBU, Philippines — Madugangan ang puwersa sa Phoenix Fuel Masters sa sunod season sa PBA human nila makuha ang beteranong point guard nga si Sol Mercado gikan sa NorthPort Batang Pier.
Ang PBA mihatag og pagtugot sa maong trade diin si Mercado mapunta sa Phoenix bugti sa duha ka mga guwardiya nga sila si LA Revilla ug Rey Guevarra ngadto sa NorthPort.
Si Mercado posibleng maoy solusyon sa problema sa Phoenix sa point guard position. Ang 11-year PBA veteran nahimong sinaligan sa Ginebra sa wala pa siya gi-trade ngadto sa NorthPort sa miaging season.
Dako unta og papel si Mercado sa kalampusan sa NorthPort nga misud sa semifinals sa miaging Governors Cup, apan nakahiagum kini og injury tunga-tunga sa series.
Si Mercado makig-uban sa ubang key players sa Phoenix nga sila si JC Intal, RJ Jazul ug Matthew Wright.
Sa ilang bahin, sila si Revilla ug Guevarra mahimong back-up guards sa NorthPort luyo nila ni Garvo Lanete ug Jonathan Grey samtang nagpaabot sila sa pagbalik gikan sa injury ni star rookie Robert Bolick.
- Latest
