CEBU, Philippines — Gikombikto sa kaso nga 'sexual assault' ang kanhi junior welterweight champion nga Adrien Broner didto sa korte sa Cleveland, Ohio.
Si Broner nga nakontra ni Manny Pacquiao, napamatud-an nga sad-an dihang usa ka babaye mipasangil nga matud pa gidumog siya sa Amerikanong boksidor ug gihagkan didto sa usa ka club sa maong lugar niadtong Pebrero sa miaging tuig.
Dili hinuon mabilanggo si Broner, apan mobayad siya og dul-an sa $900,000 ngadto sa iyang biktima.
Dili kini ang unang higayon nga nalambigit sa kagubot si Broner. Kahinumduman, nga niadtong 2016, si Broner nakatulog sa prisohan tungod sa iyang pagtuok sa usa ka waitress.
Si Broner maoy kanhi WBO featherweight, WBC lightweight ug WBA light welterweight champion.
Katapusang niaway si Broner niadtong Enero ning tuig batok ni Pacquiao diin napilde siya pinaagi unanimous decision sa ilang WBA welterweight title fight.