CEBU, Philippines — Gikalipay ni Dallas Mavericks nga dili grabe ang injury sa tiil sa ilang bag-ong superstar nga si Luka Doncic.
Dili pa hinuon paduwaon sa Mavs si Doncic, apil na ang giatangan unta niyang pakig-atbang ni Giannis Antetokounmpo sa Milwaukee Bucks karong adlawa.
Si Rick Carlisle, ang coach sa Mavs miingon nga dili nila iahat ang 20-anyos nga shooter tungod kay gusto nila nga 100 percent ang kondisyon ni Doncic.
Miangkon si Carlisle nga mibati sila og grabeng kulba human makita nga galisud pagbarog si Doncic atol sa ilang duwa sa Miami Heat niadtong Domingo.
Ang reigning Rookie of the Year nagping-it sa kasakit nga naligid sa korte dihang napilo iyang tuong tili human madasmag ngadto sa guwardiya sa Heat nga si Kendrick Nun sa first period.
Sa maong duwa, ang Mavs napilde sa iskor nga 118-122.
Si Doncic nakita na nga maoy haligi sa Mavs franchise sa iyang season average nga 29.3 points, 9.6 rebounds ug 8.9 assists.