CEBU, Philippines — Si Anthony Davis mitali og 33 puntos ug milangkat og 10 ka rebounds sa dihang ang Los Angeles Lakers mipatilaw sa Miami Heat sa labing una niining pilde didto sa ilang korte karon nga season, 113-110 sa NBA kagahapon didto sa American Airline Arena sa Miami, Florida.
Wala sab magpa-alkansi si LeBron James nga hapit maka-triple double uban ang 28 puntos, 12 ka assists ug siyam ka rebounds alang sa Lakers nga mirehistro sa ikaunom nilang sagunson nga daog.
"It was like a heavyweight bout," matud pa ni James nga migiya sa Heat ngadto sa duha ka sunod-sunod nga NBA titles niadtong 2012 ug 2013.
Si Jimmy Butler mipupo og 23 puntos alang sa Heat, kansang unom ka sunod-sunod nga daog naputol. Mao sab kadto ang una nilang pilde sud sa 12 ka duwa didto sa ilang homecourt .
Ang Heat alkansi lamang og dos puntos, 110-112, sa nahibiling otso segundos sa duwa, apan wala nila makuha ang rebound human sa nasipyat nga free throw ni Kentavious Caldwell-Pope.
Duna pa sab unta'y tsansa ang Heat nga makapuwersa og overtime, apan nasipyat ang 3-pointer ni Butler dayong kapupos sa oras.