Columbian Dyip molig-on sunod season sa PBA
CEBU, Philippines — Gipaabot nga molig-on ang puwersa sa Columbian Dyip sunod season tungo sa pagkuha nila sa No. 1 pick nga si Fil-American Roosevelt Adams.
Ang Columbian Dyip mibira ni Roosevelt sa rookie draft tungod sa kasinatian ug abilidad niini. Gipakita dayon sa Fil-Am ang iyang kalibre dihang siya ang MVP sa gipahigayon nga mini-tournament sa mga rookie hopefuls sa wala pa ang draft.
Ang 6-foot-5 nga si Adams mipasalig nga himuon niya ang tanan aron tabangan ang Columbian Dyip nga makatikang pagbalik sa playoffs. Ang Dyip katapusan nakasud sa playoffs niadto pang 2014.
Atangan usab ang tandem unya ni Roosevelt ug sa star player sa Dyip nga si CJ Perez sunod season.
Gawas sa Adams-Perez tandem, ang Columbian madugangan usab og puwersa sa pagduwa unya ni UAAP star center Isaac Go.
Si Go gikuha sa Dyip isip first pick sa Gilas Pilipinas dispersal draft. Si Go mouban sa national team nga mangandam sa 2023 World Cup, apan moduwa siya panagsa sa Dyip kon walay obligasyon sa Gilas.
- Latest