Doncic gitabla record ni Jordan

CEBU, Philippines — Gilinya ni Luka Doncic ang iyang pangan uban ni NBA legend Michael Jordan human siya mi-iskor og 26 puntos sa dihang gilampaso sa Dallas Mavericks ang New Orleans Pelicans, 130-84, kagahapong adlawa.

Si Doncic mipasa sab og siyam ka assists ug milangkat og unom ka rebounds sud sa 26 minutos. Mao kadto ang ika-18 nga sagunson nga duwa diin siya mitali og dili mominus 20 puntos, lima ka rebounds ug lima ka assists.

Gumikan niini, iyang gitabla ang record ni Jordan. Ang laing player nga nakakab-ot sa maong dungog mao si Oscar Robertson.

Sila si Tim Hardaway Jr. ug Kristaps Porzingis nagkumbinar og 27 puntos samtang si Boban Marjanovic mitampo og 15 puntos ug 16 ka rebounds alang sa Mavs, nga midaog sa ika-10 nga higayon sa miagi nilang 11 ka duwa.

Didto sa Philadelphia, si Ben Simmons mipabuto og 34 puntos sa dihang gibugha sa 76ers ang Cleveland Cavaliers, 141-94.

Si Simmons mipasud og 12 sa 14 niya ka itsa ug milansang og siyam sa 12 niya ka free throws aron tabangan ang 76ers nga magpabiling way pilde sud sa 11 ka duwa didto sa ilang korte ning season.

Sikit hinoon ang aksiyon didto sa Houston diin si James Harden mi-iskor og 18 sa iyang 34 puntos sa katapusang kuwarter aron aswaton ang Rockets ngadto sa 115-109 nga daog batok sa Phoenix Suns.

Si Harden giabagan sa iyang sidekick nga si Russell Westbrook nga mipupo og 24 puintos, 14 ka rebounds ug 11 ka assists alang sa ikatulo niyang sagunson nga triple-double.

Sa lain pang resulta, ang New York Knicks nakatilaw og laing mapait nga kapildihan sa una nilang duwa sukad gipalagpot ang ilang head coach nga si David Fizdale human sila gipahagba sa Indiana Pacers, 104-103, didto sa Madison Square Garden.