Suerte No.2 pick sa Gilas draft

CEBU, Philippines — Ang Cebuano shooter nga si Rey Suerte maoy No.2 pick sa gipahigayon nga espesyal nga draft alang sa mga ilakip sa Gilas Pilipinas pool.

Si Suerte maisip gihapon nga sulod na sa PBA uban sa Blackwater Elite, apan gituyo sa PBA ug sa Samahang Basketbol ng Pilipinas ang maong draft aron may mabira nga mga batan-ong players ang national team alang sa mga international tournaments.

Ang kanhi University of the Visayas Green Lancers nakitaan og dakong potensyal sa Blackwater nga mamahimong usa sa ilang kaugmaon tungod usab sa gipakita niining katakus human miduwa og usa ka season sa UAAP uban sa University of the East Red Warriors.

Ang No.1 pick sa Columbian Dyip sa Gilas draft mao ang bigman sa Ateneo De Manila University Blue Eagles nga si Isaac Go. Si Go una nang gitan-aw nga mamahimong No.1 human miatras sa draft ang UAAP MVP nga si Thirdy Ravena.

Ang No.3 pick sa NLEX Road Warriors mao ang laing Ateneo cager nga si Matt Nieto, samtang si Allyn Bulandi maoy No.4 uban sa Alaska. Ang No.5 mao si Mike Nieto sa Rain or Shine Elasto Painters.

Human sa Gilas draft, gisunod ang regular draft diin nakuha isip No.1 sa Columbian Dyip ang Fil-American nga si Roosevelt Adams.

Ang No.2 pick sa Blackwater mao ang 6-foot-9 nga si Maurice Shaw, samtang sila si Mike Anayon ug Barkley Ebona maoy No.4 ug No.5 pick sa Alaska ug Rain or Shine.