Pambatong sprinter na-DQ
CEBU, Philippines — Nahugno ang Fil-American nga si Eric Cray human nahanaw ang tsansa nga makahatag og bulawang medalya sa nasud sa 100m dash sa 30th Southeast Asian Games sa diin siya na-disqualified.
Si Cray pakyas sa iyang misyon human siya natawgan og duha ka violations sa pagsugod pa unta niya og hunat og dagan niadtong Domingo didto sa New Clari City athletic stadium.
Usa unta ang 31-anyos nga si Cray sa unang mga gitan-aw nga seguradong gold medalist sa nasud human usab siya naghari sa miaging 2015 SEA Games didto sa Singapore. Sa miaging 2017 SEAG sa Malaysia, si Cray nakakuha og silver medal.
May kahigayunan pa hinuon si Cray tungod kay siya gihapon ang mudagan sa men’s 400m.
Hinuon, ang laing Fil-foreign nga si Kristina Knott musuway paghatag sa nasud og back-to-back golds. Si Knott una na nga midominar sa 200m dash ug may tsansa siya nga subling mudaog sa women’s 100m final. —Lemuel P. Maglinte
Gilas masuwayan batok Indonesia sa semis
Human sa tulo ka sunod-sunod nila nga dominanteng kadaugan, ang Gilas Pilipinas gipaabot nga masuwayan batok sa Indonesia sa semifinal round sa Southeast Asian Games basketball tournament karong gabii didto sa Mall of Asia Arena.
Ang Gilas sayon nga midispatsar sa Singapore, Vietnam ug Myanmar sa group stage, apan dili mokompiyansa si Gilas coach Tim Cone batok sa Indonesia nga gipangulohan sa Serbian coach ug kanhi coach sa Gilas nga si Rajko Toroman.
“We all know who their coach is over there. We all know he’s been with the original Gilas team and he coached in the PBA. We all know how disciplined his teams are, they play will great discipline, usually very good shooting teams,” matud ni Cone sa PBA.com.
Lahi sa unang gipangandaman sa Gilas, ang Indonesia moduwa nga walay naturalized player human wala kakuha og clearance si Lester Prosper nga moduwa sa koponan.
Bisan pa niini, dako og respeto si Cone sa Indonesia nga bidahan sa beterano nga si Abraham Grahita ug Kaleb Gemilang.
Ang mudaog tali sa Pilipinas ug Indonesia maoy moabante sa gold medal round diin sangkaon nila ang mudaog tali sa Thailand ug Vietnam.
- Latest
