CEBU, Philippines — Giharos og daog sa Consolacion ang upat nila ka mga duwa aron dominahon ang cluster VII sa 2019 Governor Gwen Garcia Unity Volleyball (GUV) Cup niadtong Domingo didto sa Cordova Sports Complex.
Giablihan sa Consolacion ang ilang kampanya pinaagi sa pagpakaging sa Liloan, 25-19, 25-12 ug dayon ang Compostela, 25-14, 25-14.
Ang Consolacion spikers nakasusitinir sa ilang kainit dayon na ngadto sa pagpiog sa Cordova, 25-19, 25-20 sa ikaduhang adlaw sa aksiyon sa wala pa silyohi ang wa'y pilde nilang ratsada pinaagi sa 25-15, 25-21 nga pagpilde sa Mandaue City.
Hinuon bisan og napilde, ang Mandaue nakigduyog gihapon sa Consolacion ngadto sa quarterfinal round bitbit ang 3-1 win-loss record. Ila unyang sangkaon ang mga top teams sa laing unom ka clusters sugod karong Disyembre 7 didto sa Talisay City Sports Complex.
Ang semifinals banatan karong Disyembre 18 ug ang finals duwaon sunod adlaw sa Mandaue City Sports and Cultural Complex.