Gobert mikulit og NBA record
CEBU, Philippines – Mihimo og season-high 27 puntos si Rudy Gobert sa dihang gipakaging sa Utah Jazz ang Phoenix Suns, 125-92 sa NBA kagahapon didto sa Salt Lake City.
Doble ang pagmaya ni Gobert gumikan kay mihimo man siya og NBA record alang sa labing daghan nga dunk sa usa ka season.
Sa pagka karon, si Gobert napansak na og 270 ka dunks aron papason ang karaang rekord nga 269 ka dunks nga nahimo ni Dwight Howard niadtong 2007-2008.
"I'm not rushing like I used to and my teammates are doing a great job finding me. When I'm able to finish and draw fouls, it gives them more confidence to pass me the ball the ball," matud pa ni Gobert nga mihansak sa bola unom ka higayon batok sa Suns.
Gawas niini, napuhalan sab sa Jazz si Devin Booker nga mipabuhagay og 59 puntos sa pilderong Suns.
Sila si Derrick Favors ug Ricky Rubio dunay 18 puntos matag usa, samtang si Joe Ingles miamot og 14 puntos alang sa Jazz nga midaog kapito sa miagi nilang walo ka duwa.
Dominado kaayo sa Jazz ang duwa ug wala na sila molingi pa sukad ilang gilubong ang Suns og 19 puntos sa halftime, 62-43.
Sa laing duwa, ang Portland TrailBlazers nangayo pa og overtime una nila kuniskunisa ang Brooklyn Nets sa iskor nga 148-144.
Si Jusuf Burkic mikadlit og 32 puntos uban ang 16 ka rebounds sa wala pa siya makaangkon og injury sa iyang walang tiil sa ikaduhang overtime dihang napilo kini dihang nakig-ilog sa offensive rebound.
Si Damian Lilliard mitapos uban ang 31 puntos ug 12 ka assists alang sa Portland, samtang si D'Angelo Russell mibahog og 39 puntos, siyam ka rebounds ug walo ka assists alang sa napildeng Brooklyn.
Sa lain pang aksiyon, ang Memphis Grizzlies mipahilom sa Oklahoma City Thunder, 115-103 ubos sa pagpangulo ni Bruno Caboclo nga miiskor og career-high 24 puntos.
Si Tyler Dorsey miabuno og 21 puntos alang sa Memphis.
Nangulo sa Thunder mao si Paul George nga mipadahunog og 30 puntos ug milangkat og 12 ka rebounds, sai si Dennis Schroder miamot og 25 puntos sa iyang 9-of-14 shooting.
- Latest
