CEBU, Philippines — Laraw sa Southwestern University (SWU)-Phinma Cobras ug Sacred Heart School-Ateneo de Cebu (SHS-AdC) Magis Eagles nga langkaton na ang korona sa tagsa-tagsa nila ka dibisyon, apan angayan silang mangandam kay gituohang mobawos ang ilang mga karibal sa Game-2 sa best-of-three 19th Cebu Schools Atletic Foundation, Inc. (CESAFI) men's basketball finals diha sa Cebu Coliseum karong adlawa.
Nanghinaut ang Southwestern U nga putlon ang lima ka tuig nilang huwaw sa titulo sa dihang ilang sangkaon ang three-time defending champion University of the Visayas (UV) Green Lancers sa alas-6:45 sa gabii, human ang Magis Eagles mosuway og angkon og balik sa trono nga ilang gilingkoran tulo ka tuig ang milabay sa ilang pakigsangka sa University of Cebu (UC) Baby Webmasters sa alas- 5:15 sa hapon.
Luyo sa kalmadong pamulso nilang Lamine Thiam ug Shaquille Imperial sa himalatyong segundos nga nahiblin sa duwa, gipayaka sa Cobras ang Lancers, 70-66 sa Game-1 sa ilang best-of-three series niadtong Lunes sa gabii aron pagtikang ngadto sa usa na lang ka daog aron angkonon ang una nilang kampiyonato sukad niadtong 2014.
Ang Cobras nagplano nga i-sweep ang UV sama sa ilang gibuhat sa Lancers aron sakmiton ang labing una nilang titulo sa CESAFI Partner's Cup niadtong summer.
Gawas nilang Thiam ug Imperial, ang Cobras magsandig sab nilang William Polican, Red Cachuela, Dyll Roncal, Gerald Fernandez ug Harvey Kent Sanchez aron kab-uton ang malisud nilang misyon nga mao ang pagpakgang sa tulo ka tuig nga paghari sa Lancers.
Apan dili sayon nga tahas ang sagubangon sa Cobras gumikan kay ang Lancers mas labing nailhan sa ilang kapasidad nga makabawi ilabi na kon malisud nga tahas ang nag-atang kanila.
Niadtong 2013 CESAFI Finals, ang Lancers nakabawi human nabiyaan, 0-2 sa serye dayon na ngadto sa pagtipi sa Cobras sa kulbahinam nga Game-5 aron labnihon ang ika-10 nilang korona sukad niadtong 2001.
Sa tinguha nga buhion ang ilang kampanya nga mokadlit og talagsaong 'four-peat', si UV coach Gary Cortes maglaum nilang Lass Coulibally, Jan Monic Soliva, Jancork Cabahug, Michael Maestre, Ted Saga ug ingon man sa tulo ka kilas nilang mga guwardiya nga sila si Gileant Delator, Sheldon Gahi ug Gabriel Cometa.
Sa juniors division finals, ang Magis Eagles naglaraw nga palukapahon sa hingpit ang defending champion Baby Webmasters ug birahon ang una nilang titulo sukad niadtong 2016.
Ang Ateneans maoy nakauna sa serye, salamat sa pagkamabayanihon ni LA Casinillo, kansang 10 ka sagunson nga puntos ug ingon man ang duha niya ka free throws sa nahibiling 5.7 segundos sa duwa maoy nag-agak sa Magis Eagles ngadto sa 74-69 nga kadaogan batok sa Baby Webmasters.