2002 Goats, '99ers back-to-back champions sa USC-NABC

CEBU, Philippines — Ang 2002 Goats ug '99ers milampos paglangkat og back-to-back championships sa tagsa-tagsa nila ka dibisyon sa University of San Carlos-North Alumni Basketball Conference (USC-NABC) Cebu City Mayor's Cup 2019 diha sa USC-North Campus gym.

Si Enrico Llanto mikadlit og 24 puntos ug 25 ka rebounds  uban ang lima ka assists, upat ka steals ug duha ka blocks dihang gi-sweep sa Goats ang 2001 Shipmen, 81-56 sa ilang best-ot-three finals series aron madepensaan ang ilang korona sa Division 2. Gumikan niini, si Llanto maoy gibayaw nga Finals MVP.

Ang iyang mga teammates nga sila si Joseph Move ug Joel Dinawanao maoy naglangkob sa Mythical Five sa Division 2 uban nilang Marck Campomanes sa Batch 2005, Miguel Peras sa Batch 2003, ug Condrad Plando sa Batch 2001.

Nagpabilin sab ang '99ers nga kampiyon sa Division 1 human ilang gisilhig ang 1998 Sipat, 82-63.

Ang  forward nga si Fritz Villamor mikulit og 30 puntos, pito ka rebounds, duha ka assists ug duha ka steals alang sa '99ers hinungdan nga siya maoy gipasidunggan nga Finals MVP.

Si Villamor ug ang iyang sidekick  nga si Joseph Chu Bragat ginganlan ngadto sa Mythical Five kuyog nilang Jake Saturinas ug Al Bughao sa Batch 2007 ug Criz Matunog sa Batch 1998.

Sa seniors division, ang 1985 Legends maoy kampiyon human gipilde sa hingpit ang 1988 Barako, 82-65.

Si Lou Regidor mikolekta og 27 puntos, 15 ka rebounds, unom ka assists ug duha ka steals aron sa pagbira niini sa tropeyo isip Finals MVP.

Nakig-uban ni Regidor sa Mythical Five mao sila si Hector Lawas sa Batch '90, Dindo Sausa sa Batch '88 ug Arturo Pepito Mata ug Bingo Matugas sa Batch '86.

Ubos sa superbisyon ni commissioner Jax Bautista, ang liga naglampuson gumikan sa todong suporta ni USC alumni president Ryan  Villaflores, USC-NABC president Ernest Evangelista ug mga sakop sa Board of Directors nga sila si Jonathan Saso, Ian Callet, Tope Osorio, Byol Tan ug Dave Guardiario.