Cebu leg sa SEAG torch relay karon

CEBU, Philippines — Human sa Davao, turno na sab sa Sugbo sa pagpahigayon og 'torch relay' alang sa 30th Southeast Asian (SEA) Games karong adlawa diha sa South Road Properties (SRP).

Gibana-banang moabot ngadto sa 6,000 ka mga partisipante ang mosalmot sa lima ka kilometrong 'torch run'  karong  alas-5  sa hapon.

Ang nationwide torch relay gisugdan niadtong miaging bulan didto sa Davao City ug sumpay ang Cebu leg ug dayon ang Luzon leg.

Sa dili pa idagan ang ceremonial torch, adunay hamubo nga programa diha sa Block 5 sa SM Seaside City nga pangulohan nila ni OPAV Secretary Michael Lloyd Dino ug Cebu City Mayor Edgar Labella.  Uban nila  sila si Philippine Sports Commissioner Ramon Fernandez ug PHISGOC Chief Operating Officer Ramon 'Tats' Suzara.

Sila si Dino ug Labella lakip sa mga torch bearers uban nila ni kanhi PBA star ug karon Cebu City Councilor Dondon Hontiveros, triathlete Andrew Kim Remolino, karateka Sarah Pangilinan ug cyclist Tom Romualdez.

Tungod sa torch relay, unom ka oras nga sirad-an ang South-bound lane sa SRP sugod karong alas-2 sa hapon. 

Human sa Cebu leg, ang official SEA Games torch  dad-on  didto sa Tagaytay, Metro Manila ug katapusan didto sa New Clark City sa Tarlac nga maoy main venue sa maong multi-sporting event.