CEBU, Philippines — Maghuwat na lang si Kyrie Irving sa pagbukas sa regular season sa hinapos nga bahin ning bulana ug pahimuslan ang nahibiling mga adlaw aron magpaalim sa injury sa iyang nawong.
Ang bag-ong sinaligan sa Brooklyn Nets nga si Irving unang nakahiagum og facial fracture atol sa off-season dihang nasikhan kini sa iyang teammate atol sa team practice. Kini mipugos kaniya nga mosul-ob og protective mask, apan atol sa ilang duwa batok Los Angeles Lakers niadtong Huwebes, natiwasan kini kay sa wala tuyoa nahapakan kini ni Lakers guard Rajon Rondo.
Ang coaching staff sa Nets nagtuo nga mas maayong lakang nga dili na iahat si Irving o limitahan na lang ang oras niini sa pre-season aron malikayan ang grabe pa nga kadaot sa injury niini.
Si Irving uban si center DeAndre Jordan ang gilauman nga mopas-an sa Nets sa sunod season tungod kay dili pa kaduwa ang ilang superstar nga si Kevin Durant nga nagpaalim pa usab sa achilles injury.