Cansojong, mohon, pooc miposte'g 4-0 sweep sa Talisay Mayor Cup

CEBU, Philippines – Ang Cansojong ug Mohon maoy migawas nga  topseeds sa ilang bracket human gipakyaw og daog ang upat nila ka mga duwa sa eliminasyon sa seniors division sa 2019 Talisay City Mayor's Cup Inter-Barangay Basketball Tournament diha sa Talisay City Sports Complex.

Si Kim Trigue mipupo og 18 puntos ug si Philip Geraldez midugang og 17 puntos sa dihang gipakaging sa Cansojong ang Pooc, 88-71 aron dominahon ang Bracket B bitbit ang 4-0 nga marka.

Si Christian Sayson adunay 14 puntos ug si Fernando Nebril nga mitimbre og 11 puntos  sa Cansojong nga wala na molingi pa sukad miposte og 30-18 nga labaw sa first quarter.

Sa Bracket A, ang Mohon miligid sab sa ikaupat nilang sagunson nga daog human gilubong ang Lagtang, 100-71.

Si Romby Justinares mipabuto og 41 puntos aron pangulohan ang 29 puntos nga demolisyon sa Mohon batok sa Lagtang.

Sa juniors division, sila si Hyacinth Balorio ug Shaundyl Alipio nagkumbinar og 39 puntos sa dihang gilampurnas sa Pooc ang Lagtang, 103-64 alang sa ilang 4-0 record, samtang sila si John Nepangue ug June Cabarubias nagkumboya og 48 puntos alang sa Bulacao nga mitumba sa Tabunok, 88-83 aron labnihon ang ikatulo nilang daog sud sa upat ka duwa.