CEBU, Philippines – Nagtinguha ang three-time defending champion University of the Visayas (UV) Green Lancers nga mamawi sa miagi nilang kaparotan sa dihang ilang harungon ang Cebu Institute of Technology-University (CIT-U) Wildcats sa seniors division sa 19th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.
Ning sayo pa lamang nga bahin sa liga, natay-og na ang kampanya sa Lancers nga mokulit og talagsaong "4-peat" human sila gipilde sa University of Cebu (UC) Webmasters, 64-72 niadtong Domingo.
Si Lancers head coach Gary Cortes miangkon nga nakat-on sila og leksiyon sa maong kapildihan, apan dili sila angayan nga maalarma ning puntoha.
"Defeat is part of all competition. The players played too aggressive to score," matud pa ni Cortes diin ang gipasabot mao ang makapakugang nilang kapildihan sa mga kamot sa UC. "It's just a lesson that no team is indespensable."
Gumikan sa namungingi nilang talento, ang Lancers tataw nga inilog batok sa CIT-U, apan angayan silang magmatngon gumikan kay ang Wildcats duna may kapasidad nga makamugna og surprisa.
Sa miaging season, ang Wildcats maoy responsabli pagpatilaw sa UC og pilde human kini nakasagunson og walo ka daog. Wala lamang kini nakapakgang sa laraw sa UC nga makaangkon og awtomatik nga luna sa finals, apan mao sab kini ang hinungdan sa ilang pagkahagba.
Ning tuiga, ang Wildcats mihaw-as gikan sa duha ka sunod-sunod nga pilde batok sa University of San Jose-Recoletos (USJ-R) Jaguars ug University of San Carlos (USC) Warriors, apan sa maong mga higayon mipakita sila og maayong labok ug ang ang resulta nadesidihan sa nanghinapos na nga bahin sa duwa.
Angayan pa hinuon nga atngan kon duna ba'y madiga nga alas ang Wildcats batok sa Lancers sa ilang engkuwentro sa alas-6:45 sa gabii.
Sa pasiunang duwa sa alas-5:15 sa hapon, ang University of Southern Philippines Foundation (USPF) Baby Panthers naglaraw nga birahon ang solong liderato sa juniors division sa dihang ilang sangkaon ang UV Baby Lancers.
Ang Baby Panthers sa kasamtangan nagtabla ug ang UC Junior Webmasters bitbit ang managsamang 2-0 records, samtang ang Baby Lancers nagkupot og 1-1 nga baraha.