CEBU, Philippines — Usa ka European coach ang kuhaon sa Samahang Basketbol ng Pilipinas (SBP) nga motimon sa Gilas alang sa
Southeast Asian Games karong Nobiyembre 30 hangtod sa Disyembre 11 diin ang Pilipinas usa sa mga host.
Si SBP president Al Panlilio nagkanayon nga gidali nila karon ang pagkuha og bag-ong coach hulip ni Yeng Guiao nga mihawa human sa bati nga performance sa Gilas sa miaging FIBA World Cup didto sa China.
Mismo si Guiao ang misugyot sa SBP nga angayan nga mokuha ang Pilipinas og coach gikan sa Europe.
Nakita nga mga European teams ang nidominar sa bag-o lang natapos nga World Cup.
"We have to move quickly. I don't know if there’s a timetable. It might be a local coach, it might be a foreign coach," matud pa ni Panlilio sa Spin.ph. "That's part of the assessment. If the suggestion given by coach Yeng is that we should adopt with that style of basketball, then we do need a European coach or at least somebody who knows European basketball."
Dugang ni Panlilio, nga ang preparasyon alang sa 2023 World Cup ang gihingusgan sa Gilas ilabi na nga usa kita sa mga host.
Gawas sa sistema, ang bag-ong coach usab ang tahasan sa pagporma og lig-ong line-up aron makalahutay sa hugot nga kompetisyon sa World Cup.