CEBU, Philippines – Pormal nga gilusad ang Siomai Festival Fun Run kagahapon didto sa Tisa Barangay Hall, Dakbayan sa Sugbo.
Ang lumba gitakda karong Septiyembre 22 nga manukad ug matapos diha duol sa Gaisano Capital Tisa.
Kini ang ikatulong higayon nga ang Barangay Tisa pinaagi sa Barangay Tisa Senior Citizen Association ug sa Marathon Organizers of Metro Cebu mopahigayon sa maong kalihukan.
Matud pa ni race director ug event organizer Joe Deresas adunay gitagana nga P64,000 nga ganting salapi nga iapud-apod ngadto sa tanang mananaog.
Ang lumba nga mosikad sa alas-6 sa buntag adunay tulo ka kategoriya ug kini mao ang 3K, 6K ug 9K. Aduna kini registration fee nga P250 alang sa 3K, P300 sa 6K ug P350 sa 9K.
Nagpadayon pa gihapon ang registration ug gi-extend kini hangtod sa Septiyembre 20 sa alas-5 sa hapon sa Tisa Barangay Hall.