US team napilde na gyud sa Australia

CEBU, Philippines — Mihimo og kasaysayan ang Australian national team human nila gipilde ang powerhouse Team USA, 98-94 sa ilang tune-up game pangandam sa FIBA World Cup kagahapon didto sa Marvel Stadium sa Melbourne, Australia.

Dakong kadaogan kini sa FIBA rank No. 11 nga Australia tungod kay ilang naputol  ang 78 ka sunod-sunod nga daog sa defending champion nga US Team.

Kini ang labing unang pilde sa Team USA  sukad niadtong tuig 2006 World Championship dihang nabihag sila sa Greece. Sukad niadto, wala na mapilde pa ang Team USA, apan kagahapon napilde sila sa Australia sa kulbahinam nga duwa.

Ang San Antonio Spurs pointguard nga si Patty Mills maoy naghatag og labad sa US  Team diin siya mipabuhagay og 30 puntos. Gibuhat kini ni Mills atubangan sa iyang coach sa Spurs nga si Gregg Popovich nga mao usab karon ang bag-ong head coach sa U.S.

Ang  beteranong sentro sa Australia nga si Andrew Bogut miiskor og 16 puntos, samtang si Joe Ingles ug Aaron Baynes mitampo'g 15 ug 13 puntos matag usa.

Lahi sa una nilang duwa niadtong Biyernes diin gilubong sila sa US Team, ang   Australia  mas  agresibo kagahapon diin gigamit nila ang ilang kapisikal aron mapugngan ang mga scorers sa ilang kaatbang.

Si Kemba Walker maoy nangulo sa US Team nga mipabuto og 22 puntos, samtang si Harrison Barnes miburak og 20 puntos. Ang US Team miduwa nga wala ang duha nila ka mga sinaligan nga sila si Kyle Kuzma ug Marcus Banks nga  gipapahuway tungod sa ilang injury.

Sa ilang kapildihan, daghan ang mga pangutana kon makahimo ba ang US Team sa pagdepensa sa ilang trono ilabi na nga wala miduwa kanila ang mga superstars nga sila si LeBron James, Stephen Curry, James Harden ug Anthony Davis.