CEBU, Philippines — Parehong mirehistro og tulo ka sunod-sunod nilang daog ang Sacred Heart School-Ateneo de Cebu ug University of San Carlos human sila midaog sa tagsa-tagsa nila ka duwa sa Passerelle division sa BEST SBP Passerelle Twin Tournament kagahapon didto sa SHS-AdC Mango campus.
Ang SHS-Ateneo mibihag sa University of the Visayas, 39-34, samtang ang USC midaog batok sa Don Bosco Technical College Cebu sa kutas kaayo nga duwa nga milanat sa duha ka overtime sa iskor nga 44-40
Gibiyaan pa sa UV ang SHS-Ateneo sa first half sa iskor nga 23-15, Apan nailog sa SHS ang labaw, 29-26 gamit ang ilang scoring rally.
Si Jared Bahay maoy nangulo sa defending champion nga SHS-Ateneo sa iyang 13 puntos, samtang si Joash Cutamora miiskor og nuybe.
Ang UV gipangulohan ni Lawrence Pechan nga miposa og 10 puntos.
Sa laing bahin, dako kaayo og labaw ang USC sa first half, 21-13, apan gipapas kini sa Don Bosco sa final period.
Nakabawi hinuon ang Carolinians ug mipugos sa duwa ngadto sa duha ka overtime dayon na ngadto sa kadaogan.
Nangulo sa USC si Archimedez Allosada sa iyang otso puntos.
Ang SHS-Ateneo ug USC nagsawo karon sa unang dapit sa managsama nilang 3-0 records, gisundan sa UV sa ilang 2-1 nga baraya ug DBTC nga adunay 1-2 record.