Duha ka Gilas players naangol
CEBU, Philippines – Gihamok og injuries ang Gilas Pilipinas pipila na lang ka adlaw sa dili pa ang FIBA World Cup didto sa China.
Kini human ang duha nila ka key players ang nakaangkon og injuries atol sa team practice kagahapon didto sa Meralco Gym.
Si sharp-shooter Matthew Wright ug si forward JP Erram ang gitabang kagahapon sa mga physician sa national team human nangahagba tungod sa nagkadaiyang injury.
Si Wright, usa sa mga kasaligang moitsa og tres nakahiagum og sprain sa iyang tuhod, samtang napilo ang tiil ni Erram atol sa usa ka play.
Dili hinuon kaayo seryoso ang injuries sa duha, apan kinahanglan og pipila ka adlaw nga pahulay aron makarekober sila nga naghatag og bug-at nga bagahi ni coach Yeng Guiao tungod kay hapit na sila molarga paingon sa China.
"It would be a shame if the days go to waste, but we can't force them. We all know they just came from the finals so maybe they know how they feel, they know what their bodies require. So we're giving them the benefit of the doubt," matud pa ni Guiao sa ESPN5.
Nadismaya sab si Guiao tungod kay wala motunga sila si JuneMar Fajardo, RR Pogoy ug Troy Rosario kagahapon sa praktis nga maoy unang gisaad sa tulo.
Apan ang tulo mihangyo nga karon lang silang adlawa moapil sa ensayo tungod kay mopahulay pa sila human sa kutas nila nga PBA finals series.
Mipasidaan si Guiao nga kondili pa katunga ang tulo, mopili na siya og Final 12 bisan og wala sila.
"We'll wait for them for one or two more days but if they don't arrive, we'll have to make a decision," matud pa ni Guiao.
Ang Gilas aduna pa'y nahibiling tune-up games karong Biyernes ug Sabado batok sa Australian team nga Adelaide 39ers.
- Latest
