CEBU, Philippines – Seguradong huego-todo ang finals showdown sa duha ka teams nga pulos mangahas paglangkat sa kampiyonato sa Los Amigos Basketball Association (LABA) Summer League 2019 didto sa Co Tiao King gym sa Tabok, Dakbayan sa Mandaue.
Ang Smiley Dental Clinic ug Top V mag-abot sa knockout finals karong alas-8:30 sa gabii.
Apan sa dili pa ang ilang duwa, magsangka una ang Monterroyo-Jordan ug Lesin alang sa ikatulong dapit nga gikatakdang sugdan sa alas-7:30 sa gabii.
Grabe kaayo ang giagian sa Smiley Dental Clinic kay sila ang no. 6 sa quarterfinals ug ilang nabihag ang no. 2 nga Lesin sa semis aron moabante sa finals.
Ang Smiley Dental Clinic ni Dr. Jun Borces magsandig gihapon nilang Francis Palero ug Richard Madrid.
Ang Smiley Dental Clinic nga gipaluyohan sab nilang William Oljol, Eboy Quiñahan ug Roy Ermac makalaum sab nilang ni Rodel Royo, Ebyong Ouano, Apet Cabahug ug Nante Borces.
Samtang ang Top V magsandig nilang Rechel Bamba, Lyle Vasquez, Leo Gelbolingo ug Roque Cabarrubias.