UV milangkat sa CYBL U15 title
CEBU, Philippines — Gisakmit sa University of the Visayas (UV) ang kampiyonato sa Under 15 division sa CYBL Summer League human gipakaging ang Sacred Heart School-Ateneo de Cebu, 55-43 niadtong weekend didto sa Sacred Heart School Mango Avenue campus gym.
Naangkon sa UV ni coach Ronald 'Magic' Bucao ang ilang kadaogan usa ka semana human ilang gidominar ang Under 12 division sa susamang torneyo.
Ang Ateneo maoy naglabaw sa iskor nga 12-8 human sa unang kuwarter, apan ang UV dali kaayong mibawos aron kontrolahon ang duwa sa halftime, 25-20.
Miabante pa hinuon og balik ang Magis Eagles, 37-36 sa sayong bahin sa katapusang kuwarter, apan sila si Brian Santhony Toring, Denisvee Ryan Sinoy ug Lawrence Petchan mipasiugda og 17-3 run aron paghatag sa UV og 53-40 nga labaw sa nahibiling 1:05 sa aksiyon.
Si Petchan maoy nangu sa balanseng ataki sa UV uban ang 11 puntos, samtang si Franc Gabunada midugang og 10 puntos.
Si Joash Cutamora mihipos og otso puntos alang sa SHS-Ateneo. (BANAT NEWS)
- Latest
