'Perfect 10' gilaraw sa UV Lancers
CEBU, Philippines – Laraw sa ARQ Builders-University of the Visayas (UV) Green Lancers nga inaton ang nagkadina nilang daog ngadto sa 10 sa ilang pakigsangka batok sa University of San Jose-Recoletos (USJ-R) Jaguars sa 2019 Cebu Schools Athletic Foundation, Inc. (CESAFI) Partner's Cup karong adlawa diha sa Cebu Coliseum.
Ang Lancers mikadlit sa ikasiyam nilang daog human nakaipsot sa Cebu Institute of Technology-University (CIT-U) Wildcats, 77-74 niadtong Huwebes sa gabii.
Kon ugaling magmadaugon batok sa Jaguars human sa ilang bugno sa alas-5 sa hapon, ang Lancers segurado nang moangkon sa No.1 spot nga maghatag kanila og twice-to-beat advantage sa semifinals bisan og unsa pa'y resulta sa nahibilin nilang duha ka duwa sa eliminasyon.
Samtang ang Jaguars kon mapilde mohanap na ang tsansa nga makatikang sa Final Four.
Sa uban pang mga duwa, ang Southwestern University (SWU)-Phinma Cobras makigtigi sa University of Southern Philippines Foundation (USPF) Panthers sa alas- 3:30 sa hapon human sa engkuwentro tali sa Wildcats ug Joemang's Surplus-University of Cebu (UC) Webmasters sa alas-2 sa hapon.
Ang Cobras mipahugot sa ilang pagkupot sa ikaduhang dapit sa liderato bitbit ang 7-2 nga baraha human gipilde ang Cebu Landmasters-University of San Carlos (USC) Warriors, 72-55, samtang ang Panthers dunay pay tsansa sa semis bitbit ang 3-6 record.
Ang Webmasters nga nagtangag og 6-3 nga marka, sikit nga nakigkumbati sa Cobras alang sa No. 2 spot, samtang ang Wildcats tagak na kay usa pa ang daog sa 10 ka duwa.
Sa non-bearing match ubos sa juniors division, mag-abot ang CIT-U Wildcats ug USPF Baby Panthers sa alas-12:30 sa hapon.
- Latest