CEBU, Philippines – Ang NorthPort Batang Pier tuyo nga magsolo sa liderato sa dihang ilang sangkaon ang Phoenix Fuel Masters sa PBA Commissioner's Cup karong adlawa didto sa Smart Araneta Coliseum.
Sa kasamtangan, ang Batang Pier nagtabla ug ang TNT KaTropa sa unang dapit sa standing sa ilang 7-1 win-loss records.
Ang duwa sugdan sa alas-4:30 sa hapon.
Mismo si Batang Pier coach Pido Jarencio wala magtuo nga makataak sila sa unang dapit sa standing ug gusto pa nila nga palambuon ang ilang baraha.
Bisan og nawala kanila ilang scoring champion nga si Stanley Pringle, si Jarencio taas og kompiyansa nga motapos sila sa top two human sa elimination nga mohatag kanila og twice-to-beat advantage sa quarterfinals.
Sa main game sa alas-6:45 sa gabii, ang San Miguel Beermen ug Magnolia Hotshots magbangga pag-usab. Ang duha ka koponan maoy nagsangka sa miaging All-Filipino Cup finals diin ang Beermen ang midaog.