Palero miluwas na sab sa Black Panthers
CEBU, Philippines — Nahimo na sab nga bayani si Francis Palero human niya mapasulod ang buzzer-beating jumper sa nahabiling kuwatro segundos sa duwa aron luwason ang Black Panthers gikan sa mga kamot sa Marvel Heroes, 75-74 sa LBA Friendship Cup 2019 niadtong Sabado didto sa Lamac gym, Consolacion.
Salamat ni Roy Ermac nga nakahimo og maayong inbound pass ngadto ni Palero.
Nagtungkawo na unta sa baba sa kadaogan ang Marvel Heroes dihang labaw sila og uno punto ug ila pa ang ball possession sa katapusang 29 segundos sa duwa. Apan naabtan sila og 24 seconds violation. Mitawag dayon og time-out ang Black Panthers sa nahibiling kuwatro segundos aron pagseguro sa play.
Si Ermac maoy mihimo og inbound pass ngadto ni Palero nga mihimo'g turn-around jumper. Si Palero mitukob og 24 puntos, samtang si Ermac adunay 12 puntos sa Black Panthers nga nagtangag og 3-1 nga baraha. Mikabkab og 17 puntos si Richard Madrid sa Black Panthers nga mi-rally sa second half aron mapapas ang 30-44 nilang alkansi sa halftime.
Nangu sa 2-2 nga Marvel Heroes mao silang Roger Lacio, Roland Pitogo ug Joel sa ilang 10 puntos matag usa.
Sa laing aksiyon, ang Dota 2 miposte og 3-2 nga baraha human midaog batok sa Avengers, 69-63.
Gipangulohan ni Rico Sungahid ang Dota 2 pinaagi sa iyang 13 puntos, silang Vanz Abatayo ug Rio Quijano mitimbre'g 10 puntos matag usa.
Ang Avengers gipangulohan ni team manager Dr. Jun Borces sa iyang 19 puntos.
Puntos Matag Usa
Unang duwa:
BLACK Panthers (75) – Palero 24, Madrid 17, R. Ermac 12, Cabahug 10, Quiao 4, Goc-ong 2, Rosales 2, Chavez 2, G. Ermac 2.
MARVEL Heroes (74) – Lacio 10, Pitogo 10, Joel 10, Fredo 9, Saranza 8, Malunjao 8, Awing 6, Juksan 4, Tatay 4, Lagozar 4, Ruben 1.
Ikaduhang duwa:
DOTA 2 (69) – Sungahid 13, Vanz 10, R. Quijano 10, Aya 7, Norwin 7, Goc-ong 6, Junax 5, Tyron 5, Montermoso 4, Geverola 2.
AVENGERS (63) – Borces 19, Valle 8, Monreal 8, Dario 7, Dence 4, Janginon 4, Abillon 4, Malicay 4, Vequizo 3, Dela Cerna 2. (BANAT NEWS)
- Latest
