Cebuano fighter moaway karon sa Singapore
CEBU, Philippines – Atubangon karon ni Cebuano mixed martial arts prospect Allan Albindo sa Yaw-Yan ArDigma ang labing dakong sangka sa iyang karera batok ni Manthan Rane sa India sa One Warrior Series didto sa Singapore.
"Mao na gyud ni akong gipaabot nga chance. Daghan maayo nga moapil sa tournament pero maningkamot nga molampos," matud pa sa garbo sa Argao, Cebu.
Ang One Warrior Series usa ka combat reality series nga salmotan sa 14 ka mga MMA amateur contenders.
Tulo ang mogawas nga mananaog diin makadawat sila og fight contract sa One Championship ug $100,000 matag usa.
Si Albindo nga walay pilde sa unom niya ka amateur MMA fights, gusto mosunod sa lakang sa mga nahiunang Sugboanon nga nakaaway sa labing dakong MMA organization sa Asya nga naglakip nila ni Carry Bullos, Vaughn Donayre, Eugene Toquero, Jimmy Yabo ug stablemate Roel Rosauro.
Mitug-an ang 22-anyos nga si Albindo nga ang kalampusan sa torneyo maoy nakita niyang yawi aron mahaw-as sa kalisud.
Si Albindo nag-ensayo sud sa duha ka buwan diin gipalambo niya iyang kickboxing sa Yaw-Yan ArDigma gym, samtang iya usab gibaid iyang grappling ug Brazilian jiujitsu sa Atos Cebu.
Si Yaw-Yan ArDigma Cebu founder Master Beningo 'Ekin' Caniga Jr. miingon nga salig siya sa iyang batos nga modaog.
"Allan knows what to do and he will make adjusments in case the fight gets tough," matud pa ni Master Ekin.
- Latest
