CEBU, Philippines — Taliwala sa gibating kahinam sa bagang duot sa emosyonal kaayo nilang fans sa posibilidad nga mohimo na sila og kasaysayan karong adlawa, nagpabiling kalmado ang Toronto Raptors.
Naglabaw man tuod sila sa serye, 3-1, apan alang sa Raptors dili pa sila angayan nga magmaya kay wala pa mahuman ang ilang misyon.
Matud pa ni Raptors superstar Kawhi Leonard nga wala pa sila'y naabot ning puntoha kay wala pa nila naangkon ang gihandum nilang ikaupat nga daog sa serye aron hingpit nga palayason ang Golden State Warriors sa ilang trono.
Mao kini ang rason nganong nagpabilin silang kalmado ug wala kaayo'y kisaw nga gihimo.
"We're focused. We know that it doesn't mean anything until someone has four wins," matud pa ni Leonard. "You never know what could happen and you got to take advantage of it and don't get overly hyped and excited.
Ang Raptors nanginahanglan na lang og usa ka daog aron langkaton ang labing unang korona sa 24 ka tuig nga kasaysayan sa ilang prangkisa.
Ila kini makab-ot kon ugaling ilang tiwasan ang Warriors sa Game-5 sa NBA Finals karong buntag didto sa ilang teritoryo.
Andam man tuod sa dakong hagit, apan mapaubsanon kaayo si Toronto coach Nick Nurse sa pag-ingon nga daghan pa sila og angayan nga buhaton ug doblehon pa ang ilang paningkamot aron hingpit nilang matungas ang bukid sa kalampusan. (BANAT NEWS)