CEBU, Philippines – Masaligon ang kadagkoan sa Phoenix Fuel Masters nga magpabilin sila nga playoff contender bisan og dugay pa nga makaduwa ang suspendido nilang star player nga si Calvin Abueva.
Si Abueva gisagpa og 'indefinite suspension' ni PBA Commissioner Willie Marcial uban ang P70,000 nga multa human sa sunod-sunod niya nga mga kalapasan.
Hinuon, ang Phoenix andam bisan wala si Abueva ug positibo sila nga dili kaayo kini makaapekto sa ilang kampanya sa Commissioner's Cup.
Ang Phoenix moduwa karong alas-4:30 sa hapon batok sa Meralco Bolts didto sa Smart Araneta Coliseum.
Gawas ni Abueva, wala sab ilang coach nga si Louie Alas nga gisuspenso og duha ka duwa tungod gihapon sa karambola nga nahitabo tali nila ug sa TNT KaTropa.
Ang Fuel Masters mopaduwa usab sa bag-o nilang import nga si Richard Howell hulip ni kanhi best import Rob Dozier nga gipapahuway tungod sa injury.
Sa main game sa alas-6:45 sa gabii, ang Barangay Ginebra Kings makigbangga sa Rain or Shine Elasto Painters.